رواية موضوع عائلي الفصل السادس 6 الجزء الثاني بقلم رحاب القاضي
#موضوع_عائلي_2
"الجميله والشعر الابيض"
_البارت السادس
ــــــــــــــــــــــــــــــــــــــــ
_ وصل عمار ومعاه قسم الشرطه اللي كان فيه ابنه مروان بعد ما اتقبض وكانت ايتن واقفه بره اوضة الظابط وبتعيط ومعاها امير صاحب مروان وصحابها هي كمان ، قرب منها عمار وقال بسرعه وخوف...
عمار
في ايه يا ايتن ماله مروان عمل ايه؟...
ايتن ببكاء
والله هو مظلوم يا عمو هما السبب هما اللي دايقوه الاول..
عمار بضيق
طيب اهدي يا حبيبتي ما فيش حاجه انا هتصرف...
وقرب عمار من العسكري وقاله
قول للباشا عمار المنشاوي بره...
دخل العسكري جوه ورجع قاله
اتفضل حضرتك..
_دخل عمار جوه وجميله قربت من ايتن اللي كانت بتعيط وقالتلها..
جميله
خلاص يا ايتن ما هو المحامي جوه وكمان ابوه جه اكيد هيطلعوه..
ايتن بحزن
انتي مش فاهمه حاجه يا جميله اسكتي...
قعدت جميله جنبيها وقالت بفضول
قوليلي هو ايه اللي حصل اصلا، وليه مروان يتخانق بالطريقه دي مع انه مش كده..
_وجوه اوضة الظابط كان مروان واقف وعينيه في الارض والاتنين التانين واقفين وبيبصوله بغل وغضب....
الظابط
يعني برضو ما حدش فيكم راضي يتكلم..
ايهاب بخبث
هو يا باشا اللي جه وهجم علينا الله واعلم شارب ايه ولا ماله ده؟..
بص عمار بعصبيه للولد والظابط قال لمروان
ها يا مروان ليه عملت كده مع زمايلك؟..
_كان واقف وباصص في الارض وساكت وما نطقش بولا كلمه، والمحامي قرب من عمار وقاله..
المحامي
هو لازم يتكلم ويقول علي الاقل انهم استفزوه اي حاجه والا هيبقي موقفه صعب.
عمار قال بضيق
بعد اذنك يا باشا بس مروان وزمايله هيخلصو الموضوع ودي بينا، وانا علي معرفه بأهلهم والموضوع هيتحل ان شاء الله..
الظابط
تمام يا عمار بيه انا مش عايز الموضوع يكبر انا كمان، وخصوصا ان سنهم صغير وكلهم ولاد ناس...
_ اتنهد عمار بضيق وهو بيبص لابنه وكان متعصب جداً من سكوته، وبعد شويه جم اهل ايهاب اللي اتخانق معاه والموضوع اتحل ودي بينهم، ومشي عمار ومروان وكانت معاهم جميله وايتن، واول ما نزلو تحت كان مروان مدايق جداً وعمار قاله بحده..
عمار
روح مع السواق وانا هوصل جميله وايتن...
مروان بضيق
مش عايز اروح انا اا..
زعق فيه عمار وقال
انت تسمع الكلام وبس هات مفتاح عربيتك يلااا...
جميله
لا خلاص انا وايتن هنروح بتاكسي مش مشكله...
عمار
لا انا هوصلكم يا جميله مش هينفع تروحو لوحدكم..
وبص لمروان وقاله بحده
ما تخلص هات المفتاح..
_ طلع مروان مفتاح عربيته وادااه لباباه وراح عشان يركب العربيه بتاعت عمار اللي كان بيسوقها السواق وقبل ما يركب العربيه بص لايتن بهدوء وابتسملها بمعني انه كويس، وهي كمان ابتسمتله وفي الوقت ده جميله قالت..
جميله
هو ده وقت محن انتي وهو..
ايتن بغيظ
في ايه يا جميله بقي..
_ وراحت ركبت العربيه بتاعت مروان من ورا، وجات جميله تركب جنبيها بس عمار قفل الباب وقالهت..
عمار
هو انا السواق بتاعكم ولا ايه، تعالي جنبي..
جميله اتوترت وقالتله
مش قصدي بس انا عايزه اقعد جنب اختي..
عمار بهدوء
وانا عايزك تقعدي جنبي ممكن؟..
_قال كلامه وبكل شياكه فتحلها باب العربيه اللي جنبيه، ابتسمت جميله وركبت جنبيه وهو ركب من الناحيه التانيه واتحرك بالعربيه وايتن قالتله بقلق...
ايتن
علي فكره يا عمو مروان مالوش ذنب في اللي حصل، ايهاب هو اللي ديماً بيتعمد يستفزه..
عمار بجديه
قوليلي يا ايتن هو ايه اللي حصل بالظبط اصلا؟..
ـــــ #بقلم_الكاتبه_رحاب_القاضي ـــــ
_ وفي بيت عماد..
جهاد بخوف _
انت بتقول ايه يا عماد انا اختك ازاي تطلب مني حاجه زي كده؟؟...
زعق عماد فيها وقال _
اومال يعني اجيب فلوس منين؟...
جهاد ببكاء _
وانا مالي شالله ما عنك جيبت فلوس، انت مستوعب انت بتطلب مني ايه وعايزني اعمل ايه؟..
رد عليها عماد وهو ماسك ايدها وبيبوسها _
عشان خاطري يا جهاد ابوس ايدك المره دي وبس انا لو مجاتنيش فلوس النهارده هموت..
سحبت ايدها منه وقالت وهي بتعيط
قي ستين داهيه يا واطي، ياريتك مت قبل ما تطلب مني حاجه زي كده، عايز تخليني ابيع شرفي لصحابك عشان اجيبلك فلوس تصرفها علي النسوان والقرف اللي بتشربه،ده لو بابا كان عايش وسمعك بتطلب مني كده كان قتلك...
عماد بعصبيه _
طيب ايه رئيك بقي انك هتروحي يعني هتروحي وغصب عنك...
جهاد بعصبيه وهي بتمسح دموعها قالتله _
وانا بقولك مستحيل انت فاهم ولا لا..
عماد بحده _
بقي كده طيب اطلعي بره، ويا ترجعي ومعاكي فلوس يا ما اشوفش وشك تاني...
سكتت جهاد وفضلت تعيط، فزعق فيها وقال _
غوري يلاااا..
اداها ورقه في ايدها وقال _
ده العنوان بتاع زكريا المنشاوي صاحبي عشان لو عقلتي وقررتي تروحيله...
_طلعت بره الشقه وهي مش عارفه تروح فين قعدت علي السلم وفضلت تعيط وطلعت من الشقه اللي قصادها الست نورا، واول ما شافتها كده جريت عليها وهي خايفه وقالتلها...
الست نورا _
مالك يا بنتي الواد اللي جوه ده عملك حاحه؟..
ردت عليها جهاد من وسط بكاها وقالت _
انتي كان معاكي حق، اخويا واحد مش كويس ومش محترم..
الست نورا بضيق _
لا حول ولا قوة الابالله، استهدي بالله يا بنتي وادخلي جوه، احنا بالليل والوقت متأخر ادخلي واللي بينك انتي واخوكي هيتصلح ده انتو اخوات..
جهاد ببكاء ردت عليها وقالت _
مستحيل يا حجه نورا، اخويا طردني وقالي اا..
الست نورا بقلق _
قالك ايه بس يا بنتي يخليكي تعملي في نفسك كده؟..
ردت عليها جهاد وقالت بنبره حزينه _
قالي يا اروح اجيبله فلوس يا ما ارجعش تاني هنا...
الست نورا بقلق_
طيب وهو عايزك تجيبي فلوس منين؟..
_خافت جهاد. تقولها علي اللي عايزاه منها اخوها، الست تقول للناس عليهم وتحصل مشاكل، فردت عليها جهاد وقالتلها وهي بتكدب..
جهاد بدموع وحزن _
من عند مجدي اخويا، هو قالي اروح اجيب فلوس منه...
الست بهدوء _
طيب تعالي انا هوقفلك تاكسي وروحي هاتي الفلوس من عند. اخوكي وخليه هو يوصلك لحد هنا وانتي راجعه، بس قعدتك علي السلم دي غلط..
بصتلها جهاد وقالت بحزن _
انتي طيبه اووي يا حجه نورا...
الست نورا بسخريه ردت عليها وقالت _
وانتي باين عليكي عبيطه اووي يا جهاد، تعالي معايا..
_قامت جهاد مع الست نورا واخدتها تحت ووقفتلها تاكسي ووصلها لبيت اخوها، واول ما شافت البيت استغربت انه بيت كبير ده زي القصر وقالت لنفسها..
جهاد _
هو جاب منين البيت ده، هو مش قال ان الشركه افلست وكمان هو مكنش لاقي فلوس..
_قالو للبواب انها اخت مجدي فسابها تدخل، وخبطت علي الباب وفتحتلها الخدامه ودخلت قعدت مستنياه ينزل من فوق، عدت يجي نص ساعه وبعدين نزل وقعد قدامها وقال وهو مدايق..
مجدي _
انتي عرفتي عنواني منين؟..
ردت عليه وقالت بحزن _
روحتلك الشركه وسألت عليك قالولي انك مشيت فاخدت منهم العنوان هنا، وهما ادوه ليا بعد ما عرفو اني اختك..
مجدي بحده _
وجايه عايزه ايه يااا... يا اختي؟...
نزلت دموعها وقالتله _
عماد مبهدلني و...
كمل مجدي كلامها وقال _
واخد فلوسك ونصيبك في البيت وضيعهم علي النسوان والشم صح؟..
جهاد _
انت عرفت منين؟..
مجدي بسخريه رد عليها وقال _
انا عارف حاجه زي كده من الاول اصلا...
ط
جهاد ببكاء _
طيب ليه خلتوني اقعد عنده، ليه ما قولتليش ابعدي عنه ليه، هو مش انا اختكم..
وقف مجدي وزعق فيها وقال _
لا مش اختنا انا معنديش اخوات غير شيماء انما الصايع عماد ده انا متبري منه، وانتي يا بنت مرات ابويا ياللي امك خطفت ابويا من امي وخلتها راحت بحسرتها انتي مش اختي ولا عمري هعتبرك اختي...
بكت جهاد اكتر وقالتله _
طيب ماما عملت كده انا ذنبي ايه، ليه تخلو عماد. يعمل فيا كده.، ده عايزني اروح ا..
قبل ما تكمل كلامها زعق فيها مجدي وقال _
ماليش دعوه عايز منك ايه، امشي اطلعي بره ومتجيش هنا تاني فاهمه ولا لا؟..
جهاد ببكاء وخوف ردت عليه وقالت _
ابووس ايدك يا مجدي متخلنيش اروحله واسمعني بس ده عايزني اروح لصاحبه وو..
مجدي بعصبيه قالها _
انتي هتطلعي بره ولا انادي الامن يرموكي بره..
_مردتش عليه عليه وطلعت وهي قلبها حزين وحاسه انها مش لاقيه حد تسند عليه من اهلها، او بمعني اصح هي ملهاش اهل، طلعت الورقه اللي فيها عنوان زكريا وفضلت تعيط اووي وقعدت في الشارع وبعدين شافت شوية شباب بيبصو عليها بطريقه مش كويسه، فجريت بسرعه من قدامهم ووقفت تاكسي وقالتله يوديها عند عنوان زكريا...
ـــــ #بقلم_الكاتبه_رحاب_القاضي ــــــ
_ وقدام بيت جميله..
وصل عمار وهو معاه جميله وايتن، وايتن قالت وهي بتبص في موبيلها..
ايتن
ماما كانت بعتالي رساله اجيب عيش معايا من السوبر ماركت، استنيني يا جميله عند الاسانسير عشان اقولها اني اتاخرت وانا كنت معاكي..
جميله
ماشي بس اخلصي عشان انا جعانه ما اكلتش حاجه والله من صباحية ربنا..
جات ايتن تنزل بس رجعت وقالت لعمار
ممكن ما تزعلش عمار، وما تقولش اني قولتلك حاجه ارجوك عشان خاطري..
ابتسم عمار وقبل ما يرد جميله قالت
ويزعله ليه الحق مش علي مروان، الحق علي اللي كان متجوز واحده مركز شباب..
بصلها عمار بجمود وايتن قالت بأحراج
طيب انا هروح اجيب عيش بقي....
نزلت ايتن وجميله قالت بأحراج
انا ما اقصدش يعني بس مروان برغم انه رخم بس صعب عليا بجد..
عمار بهدوء
عادي يا جميله انا سمعت عنك انك دبش وما بتاخدش عليكي...
جميله بتلقائيه
سمعك تقيل مع ان ودنك اد الطبق اهي..
عمار بغيظ
انزلي يا جميله روحي استني اختك يلا يا ماما...
جميله وهي بتضحك
والله العظيم ما اقصد بس هو انت فعلا ودنك كبيره هههههههه..
ابتسم لضحكتها وقال بكل هدوء
ياريت تبقي الدنيا فعيني حلوه كده زي ضحكتك يا جميله...
بطلت ضحك وقالت
انت قولت ايه؟..
قرب منها شويه وقال
هو انتي ما حدش قبل كده ان ضحكتك حلوه اووي..
جميله اتوترت وقالت
لا مم ماما بس اللي بتعلق عليها، بس بتقولي بطلي تنهقي زي الحمير..
_ضحك عمار بصوت عالي، وهي اتكسفت وقالت بسرعه وكسوف..
جميله
لا يعني اكيد ما تقصدش حاجه وبعدين انت وترتني وانا لما بتوتر ما بعرفش بقول ايه...
عمار بمرح
حلو برضو..
جميله
هو ايه؟..
غمزلها وقال
توترك...
_ اتكسفت اكتر ووشها احمر وقبل ما تقول اي حاجه جات ايتن وقالتلها..
ايتن
انتي لسه هنا..
عمار بخبث
مش راضيه تنزل من العربيه..
ايتن
جميله... جميله انتي متنحه علي ايه؟..
كتم عمار ضحكته وجميله بصتلها
هاا في ايه؟..
ايتن
انتي هتباتي هنا انزلي ماما كلمتني ومتعصبه يلاا..
عمار
انزلي يا جميله ونكمل كلامنا بكره..
جميله بسرعه قالت
لا طبعا ما ينفعش..
ونزلت من العربيه وقالت
انت اكيد كنت بتجبر بخاطري تلاقيه في عيالك وصحتك يارب، يلا سكة السلامه انت يا غالي..
عمار بغيظ وصوت واطي
يخربيت غباء امك يا جميله ..
_ ومشي بعربيته من غير ما يرد عليها، وايتن قالت لجميله وهما في الاسانسير...
ايتن
هو عمو عمار قالك ايه خلاكي تتكسفي كده، ده عمل معجزه انا اول مره اشوفك متوتره زي البنات..
بصت جميله حواليها وايتن قالت
انتي بتعملي ايه احنا في الاسانسير، انطقي ما حدش هيسمعنا..
جميله بكسوف
قالي ان ضحكتي حلوه وتوتري جميل..
اتفتح باب الاسانسير وايتن فضلت تضحك وقالت
ههههههههه بقي كل ده عشان الكلمتين دول، علي فكره الراجل نيته صافيه لانه بيقولي كده انا وصحابي وشيك وذوق في كلامه..
جميله بحزن
بجد تفتكري هو شايفني مش مناسبه ليه عشان فارق السن وكده..
ايتن
بصي هو فارق السن مش كبير بتحصل عادي، المشكله في الظروف عمو عمار كان متجوز قبل كده وكمان عنده ابن كبير مش صغير وغير كده والله عمو عمار ليه علاقات كتيره ، ده راجل بقاله 16 سنه اعزب..
جميله بدموع
خلاص يا ايتن اصلا واحد. زيه مستحيل يفكر فيا، انا مش حلوه وفيا عيوب كتير وشخصيتي وحشه ومش زي باقي البنات..
مسكت ايتن ايدها وقالت
بالعكس والله انتي جميله اووي، وشخصيتك حلوه انتي لسه طفله فكل تصرفاتك ومشاعرك يا جميله والله انا ديماً بشوفني اكبر منك..
_ابتسمت جميله ودخلو جوه ولقيو فريده بتجهز العشا ولما شافتهم قالت..
فريده
هاا لميتو كام نقطه؟..
جميله بسخريه
لا احنا هنجيبلك نقطه لحد عندك...
ايتن كتمت ضحكتها وقالت
في ايه بس يا ماما ليه بس الكلام ده؟..
فريده
ما هو ما فيش بنات محترمين يرجعو في وقت زي ده غير لو كانو بتوع هشك بشك..
جميله
ما هو بنتك والشرشوبه اللي ماشيه معاها اا..
ايتن بسرعه قالت
جميله يا ماما كان عندها شغل كتير وكلمتني استناها عشان ما تروحش لوحدها وعمو عمار حلف ليوصلنا عشان الوقت اتأخر...
جميله بأنبهار
واااو عايشين مع وحيد حامد وانا ما اعرفش...
فريده قربت منهم وحضنتهم وقالت
يا كدابين مروان كلمني وقالي اللي حصل، وقالي ما ازعلكيش عشان اتأخرتي يا مقصوفة الرقبه انتي..
ايتن بحزن
طيب هو كان مدايق وهو بيكلمك، صوته كان زعلان صح..
جميله بغيظ
كتير عليا ده بقي العيال دول بيهتمو ببعض كده وانا مش لاقيه حتي قطه حرفياً..
فريده ضحكت وقالت
هههههه حصل ده انتي القطه اللي جبتيها ما اتحملتكيش وطفشت..
جميله
متشكريييين يا امومه انا هدخل اغير هدومي..
فريده
وتيجي تتعشي يلا يا ايتن عملالكم مكرونه بالخضار..
جميله وايتن في صوت واحد
مش بنحبها يا فريده..
فريده
يلا يا بنت الجزمه منك ليها...
ـــــ #بقلم_الكاتبه_رحاب_القاضي ــــــ
_ وعند جهاد..
نزلت بعد شويه وطلعت العماره اللي فيها شقة زكريا اللي عايش فيها لوحده بعيد عن باباه، خبطت علي الباب وفتحلها هو وسالها..
زكريا
نعم ؟...
نزلت دموعها وردت عليه بصوت مقطع
اا انا جهاد...
ضحك زكريا وقالها
نعم يا جهاد عايزه ايه؟...
جهاد بتوتر ردت عليه وقالتله
انا جهاد اا عماد اا..
زكريا وهو بيبصلها من فوق لتحت
اااه انتي البنت اللي بعتها عماد طيب مش تقولي كده من الاول، خايفه ليه كده تعالي ادخلي..
_اتنفض جسمها بخوف وكانت عايزه تجري بس كانت هتروح فين والشارع مليان بمليون واحد زي اللي قدامها ده، فدخلت وهو قفل الباب...
بصلها زكريا وهي واقفه عند الباب وقال
مالك واقفه كده ليه ادخلي..
_ كلمة رعب كانت قليله جدا علي اللي حست بيه لما اتقفل عليهم الباب، ورجعت كام خطوه لورا وقالت بخوف..
جهاد
لا لا انا اا انا مش هقدر...
زكريا بجمود
اومال كنتي جايه ليه من الاول..
جهاد بحزن
همشي خلاص، ايوه انا همشي..
وجات تمشي بس هو مسك ايدها جامد وقال
علي فين بس، ده انتي حتي عجبتيني شكلك جديده لا ومختله، انا اول مره اشوف واحده لابسه طرحه في الشغلانه دي..
حاولت تفك ايدها من ايده وقالت بخوف
انا مش بشتغل كده لو سمحت سيبني..
قرب منها اوووي وقال
لا مش هسيبك انتي جيتي بمزاجك ودخلتي هنا بمزاجك، بس هتمشي بمزاجي انا...
_وبعد شويه رجعت البيت عند اخوها ودموعها مش مبطله تنزل علي وشها واول ما شافها عماد قام بسرعه وراحلها وقال...
عماد بقلق _
ها اداكي اد ايه فلوس..
_بصتله بقرف وقالت
ده اللي فارق معاك مش فارق معاك شكلي وهدومي اللي اتبهدلت واللي حصلي،مش فارق معاك اللي عملو فيا الكلب اللي انت بعتني ليه..
مسحت دموعها وقالت
بس لو كان فارق معاك ما كنتش عملت فيا كده من الاول،حسبي الله ونعم الوكيل فيكم وعارف انا كل يوم هدعي عليك ربنا لا يرحمك دنيا ولا اخره يا عماد انت واخواتك...
_خلصت كلامها ورمتله الفلوس اللي اداها ليها زكريا في وشه وهو قعدت علي الارض يلم فيهم زي المجنون، وهي دخلت اوضتها وفضلت تعيط علي اللي حصلها من اخواتها ومن صاحبه وقالت..
جهاد ببكاء
سامحني يارب انا بقيت وحشه سامحني والله مش بايدي...
ـــــــــ #بقلم_الكاتبه_رحاب_القاضي ــــــــ
_ وتاني يوم الصبح...
في شقه حلوه جداً في مكان راقي، وقف مروان قدام الباب شويه ودموعه ماليه عينيه وبعدين خبط علي الباب وفتحله ولد اكبر منه بكام سنه وقاله..
سيف
نعم انت عايز مين؟..
زقه مروان ودخل وقال
ماما يا ماماااا...
_طلعت مامته من اوضة نومها وهي لابسه هدوم النوم وباين فعلا شكلها صغير وجميل اوي وقالت..
سميره
نعم يا مروان ايه اللي جابك علي الصبح كده؟..
بص مروان للارض وقال
عايز اتكلم معاكي شويه..
سميره بسخريه
ما تتكلم هو حد ماسكك..
بص مروان للولد اللي وراه وقال
لوحدنا..
سيف
يا ابني اتكلم قصادي عادي ما تتكسفش..
سميره
معلش يا حبيبي ادخل استناني جوه هشوفه عايز ايه وهجيلك..
سيف اتنهد بضيق وقال
اوكي يا بيبي...
_دخل سيف اوضة النوم وهو بيبص لمرولن بسخريه، ومروان ادايق اكتر وبص لمامته اللي قعدت قدامه وولعت سجاره وقالت..
سميره
نعم ادينا بقينا لوحدنا..
مروان قعد جنبيها وقال بدموع
ممكن كفايه..
سميره
كفايه ايه؟..
مروان
انا مش جاي اتخانق معاكي ولا ازعق ولا اقولك حاجه تدايقك عشان انتي امي ومهما حصل انا هفضل احبك..
نزلت دموعه وقال
بس انا كبرت واللي حضرتك بتعمليه ده بيخلي.. بيخلي شكلي وحش قدام صحابي او اي حد يعرفني..
سميره
هو ايه اللي انا بعمله يا سي مروان؟..
مروان بحزن
علي سبيل المثال الواد اللي جوه ده..
سميره
اللي جوه ده يبقي جوزي، وبعدين انت يا ولد جاي تقولي اعمل ايه وما اعملش ايه؟..
مروان بدموع
لا العفو انا مش بمنعك تتجوزي براحتك بس يكون حد مناسب لو قولت ده جوز امي ابقي بتشرف بيه زي ما بتشرف بابويا، مش عيال كل يوم تتجوزي واحد اصغر من اللي قبله..
سميره
انا حره اعمل اللي عايزااه، وبعدين ما انا شكلي صغير ده انو ابان اختك يا واد مش مامتك...
مروان ببكاء
انا بتعاير بيكي وباللي بتعمليه، انا كنت هبات في القسم امبارح بسببك..
وقفت سميره وقالت
بقولك ايه انت مش قاعد عند باباك وانا مرتاحه منك، جاي تصدعني ليه دلوقتي..
مروان وقف وقال
شكراً انا غلطان ان افتكرت اني ممكن اصعب عليكي يا ماما..
_ وسابها ومشي واول ما نزل تحت لقي عمار واقف قدام عربيته ومستنيه..
عمار بحزن
كنت عارف انك هتيجي هنا، وكنت عارف برضو ان ده اللي هيحصل...
حضنه مروان وقاله
انت اعظم اب في الدنيا، وانا مهما هعمل مش هردلك اللي انت بتعمله معايا وعشاني..
بعد عنه عمار وقال
ترد ايه يا اهبل ده حقك عليا، المهم قولي امك غيرت شعرها للون ايه المره دي اخضر ولا احمر..
ضحك مروان وقال
ههههه لا مخليااه بني عادي..
حط عمار ايده علي كتف مروان وقال
ده ايه اللون الغريب ده، تعرف يوم ما انجوزتها عملتلي شعرها ابيض كنت حاسس نفسي متجوز جدتي ياااه لبشاعة اليوم..
ضحك مروان وقاله
تعالي فطرني بره..
عمار غمزله وقال
خلي الفطار ده لايتن انتو مش عندكم سنتر كمان شويه، انا عندي شغل يلا روح..
مروان غمز نفس غمزة عمار وقاله
طيب ابقي سلملي علي جوجو هاا..
عنار ابتسم وقال
لا جوجو دي ربنا يسلمنا منها..
_ ضحكو هما الاتنين، وكل واحد ركب عربيته وراح للمكان اللي عايزه..
ــــــ #بقلم_الكاتبه_رحاب_القاضي ــــــ
_ وتحت بيت جميله...
كانت نازله رايحه الشغل وفجأه خبطت في يونس اللي كان داخل بسرعه وقالها بعصبيه..
يونس
ما تفتحي انتي عاميه..
جميله بغيظ
قول لنفسك بدل ما انت داخل زي الطور كده..
يونس بغضب
من حظك اني مش فايقلك، غوري من وشي..
مشي يونس وجميله قالت لنفسها
انا يبرقلي ويقولي غوري...
_ ومسكت طوبه من الارض وضربته بيها في ضهره واول ما بصلها جريت بسرعه...
يونس بغيظ
يا بنت المجنونه..
_ واول ما وصل الاسانسير طلع فيه بسرعه، وراح خبط علي شقة صبري وبعد ما خبط فتحتله زهره وقالت..
زهره
ازيك يا يونس اتفضل..
يونس دخل وقال
فين شهد؟..
زهره
جات من شويه هو ايه اللي حصل بس؟...
يونس
انا هدخل اتكلم معاها معلش لوحدنا..
زهره
البيت بيتك يا اخويا اتفضل...
دخلت يونس جوه وطلع اثر ابنها وقالها
هو في ايه يا ماما، عمتي شهد شكلها هتطلق صح؟..
زهره بحده
تف من بوقك يا واد بعد الشر ان شاء الله تكون مشكله بسيطه وتعدي..
_وعند شهد كانت نايمه جنب ولادها ودموعها ماليه عينيها، وفجأه فتح يونس الباب ودخل وقفله ورااه..
قامت هي بسرعه وقالت
انت جاي تعمل ايه اطلع بره..
يونس بجمود
هي كلمه وهي هكررها هاتي الولاد ويلا بينا علي بيتنا نحل مشاكلنا فيه براحتنا..
شهد بحده
بيتنا ايه انت مالكش بيت معايا هو كان بيتي لوحدي وانت كنت فيه مجرد ضيف...
يونس بجمود
كل حاجه هتتغير واللي عايزاااه انا هعمله بس مش هقدر اعيش من غيرك...
شهد بسخريه
رجع الزمن لورا وما تخونيش وانا هرجعلك، اصل انا مش قليله ولا ناقصني حاجه عشان اقف قدام الرخيصه اللي كنت معاها وتقولي لما جوزك كان معايا كان..
_ بصتله من تحت لفوق بقرف، وهو اتنهد بضيق وقالها..
يونس
بسببك تحبي افكرك اخدتي كام شهر بتباتي جنب ولادك ولا كأنك متجوزه وكل حاجه فيكي متغيره، انا كنت بتكلم معاكي بتفضلي تشتكي بس الولاد الولاد وبس، طبيعي ابص بره...
شهد بحده
لا مش طبيعي، عشان لو كان طبيعي كنت انا في السنين اللي عدت دي وانت راكني في البيت خونتك ميت مره، بس انا مش واطيه زيك علي الاقل انا كنت ببقي مشغوله في ولادك انما انت لما كنت بتسيبني بالشهور كنت بتكون فين ومع مين الله واعلم، ده انا اتنين اللي عرفتهم في يوم واحد اومال لو دورت وراك تاني هلاقي ايه..
_ بصت شهد لولادها اللي كانو صاحين وبيتفرجو عليهم وهما خايفين..
يونس بحزن
طيب عشان الولاد انتي مش هتقدري تربيهم لوحدك...
شهد بسخريه
بالعكس هقدر يا يونس وهتشوف، بس اني ارجعلك ده مستحيل انت انتهيت وحياتي معاك انتهت خلاص..
يونس بضيق
انا مش هطلقك. يا شهد هسيبك تهدي شويه وهنتكلم تاني وهنرجع..
شهد بحده
لو ما طلقتنيش هخلعك..
_ ما ردش عليها يونس وطلع بره البيت كله، ودخلت عندها زهره وقالت..
زهره
في ايه يا شهد ريحيني يا بنتي وقوليلي ايه اللي حصل؟..
قبل ما ترد شهد يوسف قال
ما فيش يا زوزو ماما هتقلع بابا..
يزن بحزن
قق قالت هتخلعه..
زهره بصدمه
الكلام ده بجد يا شهد؟..
شهد بصت لولادها بغيظ وقالت
انا والله ما عرفتش اربيكم...
ـــــــ #بقلم_الكاتبه_رحاب_القاضي ـــــــ
_ في شقة زكريا..
صحي من نومه علي صوت موبيله اللي بيرن، رد علي اللي بيكلمه وقال..
زكريا
ايوه...
الشخص
يونس الصاوي بيحاول يوصلك..
زكريا
تمام سيبه يوصل بالسلامه...
الشخص
بس الراجل ده خبيث حبتين...
زكريا
قولتلك خليه يوصل يا اسامه، واقفل عشان لسه صاحي..
_قفل معاه اسامه وهو بص جنبيه وافتكر جهاد واللي عملو فيها، اتنهد بضيق وقام عشان يروح الحمام بس لفت نظره سلسله دهب واقعه جنب السرير...
ـ قام وشالها من علي الارض وكانت علي شكل مصحف، فتحها ولقي فيها صورة راجل كبير في السن وست في نفس سنه تقريباً... عرف انها بتاعت جهاد ابتسم بهدوء وقال....
زكريا
وبعدين يا جهاد، مش هخلص منك ولا ايه.
_ شالها في محفظته وبعدين دخل الحمام وطلع عمل فطار لنفسه، وبص لموبيله لقي باباه بيرن عليه قفل في وشه وما ردش...
ــــــ #بقلم_الكاتبه_رحاب_القاضي ــــــ
_ وفي شركة عمار المنشاوي..
وصل عمار شغله ونزل السواق بسرعه وفتحله الباب وعمار نزل من العربيه وقاله..
عمار
شكراً يا وليد خليك هنا بقي عشان لو احتاجتك..
وليد
تحت امرك يا عمار بيه..
_ دخل عمار الشركه واول ما دخل شاف جميله واقفه مع زمايلها وبتضحك، وكان في واحد من الموظفين واقف جنبيها وبيبصلها بهدوء ونظره مختلفه من غير ما هي تاخد بالها، اتدايق وقال بصوت عالي..
عمار
جميله تعالي عايزك..
_راح وقف قدام الاسانسير وجات جميله وراه ووقفت حنبيه وقالتله..
جميله
نعم يا عمار بيه؟..
عمار
بتضحكي علي ايه؟..
جميله
ده محمد مراته ولدت وبيحكيلنا عن مغامراته مع البيبي وكده، هو في حاجه؟..
عمار
الاسانسير واقف فوق، ثواني..
بص عمار لموظف الاستقبال وقاله
محمد ابعت حد يقفل باب الاسانسير فووق مش حكايه دي..
محمد
عينيا يا عمار بيه حالاً...
جميله
هو كده اخرك ده افتكرتك هتزعق وعلي الاقل ترفد موظف او اتنين هنا..
عمار
ايه الاوفر ده، كله باب اسانسير، المهم فطرتي؟..
جميله
لا لسه والله يدوب شربت لبن عند ماما بس..
وصل الاسانسير وعمار قالها
طيب هطلبلك فطار معايا تعالي يلا..
جميله ركبت الاسانسير جنبيه وقالت
لو سمحت يا عمار بيه احنا هنا في الشغل والمفروض ما تعاملنيش غير زي الموظفين وبس عشان ما حدش يقول عليا حاجه...
عمار
انتي هبله يا جميله هو الفطار هيخليهم يقولو ايه مثلا، وبعدين انا بتعامل كده مع الكل...
_ وصل الاسانسير وطلع عمار وهي وراه جميله واللي راحت وقعدت علي مكتبها، وعمار وقف وقال لفيروز..
عمار
انتي فطرتي يا فيروز ولا لسه؟.
فيروز
ايوه فطرت يا عمار بيه، تحب اطلب لحضرتك فطار...
عمار بص لجميله وقال
ايوه واطلبي لجميله معايا كمان..
_قال كلامه ودخل مكتبه وجميله ابتسمت بكسوف، بس اتغيرت ملامح وشها لما فيروز قالت..
فيروز
ما تفرحيش اووي كده، عمار بيه كان اوقات كتير بيفطر مع الموظفين تحت هو متواضع مع الكل..
جميله بغيظ
هو انا كنت قولت حاجه يا ساره مكاتب.
فيروز بغيظ
اسمي فيروز بطلي تقوليلي ساره مكاتب دي يا جميله..
جميله
ما انا قولت ساره مكاتب اهو هو انا قولت غير كده..
فيروز بغيظ
هتطفحي ايه؟...
جميله
نص فرخه..
فيروز
نعم؟!..
جميله
اي حاجه..
فيروز
هطلبلك زي عمار بين بما انكم هتفطرو مع بعض..
جميله بضيق
لا استتي اصلا غلط افطر معاه في مكان لوحدنا حتي لو كان المكتب، بصي اطلبيلو لوحده انا كده كده مش جعانه..
فيروز ابتسمت وقالت
براحتك يا جميله، بس هطلبلك حاجه كده علي جنب تاكليها هنا..
جميله
اصيله يا ساره مكاتب والله..
فيروز بغيظ
مش هطلبلك حاجه بس..
_ضحكت جميله، وفيروز طلبت فطار لعمار...
ــــــ #بقلم_الكاتبه_رحاب_القاضي ــــــ
_ وبالليل في بيت يونس...
كان قاعد مدايق جداً ومن الصبح ما راحش الشغل ولا كلم حد ولا رد علي اي حد بيكلمه، وقربت منه سعاد مربية ولاده وقالت..
سعاد
يا يونس بيه..
بصلها يونس وقال
نعم؟..
سعاد
الشغالين كانو بيسألو احنا هنعمل ايه، هنبقي اجازه ولا هنكمل اصل شهد هانم قبل ما تمشي قالت انها مش راجعه تاني وان حضرتك اللي هتاخد القرار..
يونس بحزن
لا طبعا هي راجعه كل واحد يكمل شغله زي مة هو، حتي انتي هو كام. يوم وشهد والولاد راجعين..
ابتسمت سعاد وقالت
طيب علي خير ان شاء الله..
_وفي الوقت ده الباب خبط وواحده من الشغالين فتحت، ودخلت دارين وقالت ليونس..
دارين
هو في ايه يا يونس..
يونس وقف وقال بعصبيه
انتي ايه اللي جابك هنا، اطلعي بره..
دارين
انا مش فاهمه انت بتعمل كده ليه، وبعدين رقم مراتك ايه اللي عندي وامسحه والله العظيم انا ما اعرف مراتك ولا عمري شوفتها وهعمل كده ليه؟..
كانت بتتكلم ودموعها ماليه عيونها وكملت كلامها
انا مش جايه استعطفك واقولك اني مظلومه او اي حاجه، انا بس بقولك اني يعتبر لقيت طريق هتقدر تتواصل بيه مع زكريا المنشاوي...
يونس
امشي يا دارين ونتكلم في الشغل، بس ده بيت شهد مراتي وهي مش هتكون متقباه وجودك فيه فياريت تمشي وما تجيش هنا تاني..
دارين بحزن
حاضر بس والله العظيم انا ما بعتلهاش اي حاجه ولا كنت اعرفها ولا اعرف حاجه عنها..
يونس بجمود
مع السلامه..
_ طلعت دارين ويونس طلع فوق اوضته وقفل موبيله ونام....
_وعدي اكتر من شهر وحصل؟...
_تفتكرو هيحصل ايه؟
ــــــــــــــــــــــــــــــــــــــــ
#بقلم_الكاتبه_رحاب_القاضي
